طريقة عمل البصارة

طريقة عمل البصارة

البصارة من الاكلات المصرية القديمة وهي وجبة متكاملة ولذيذة وسهلة التحضير

مكونات ومقادير البصارة

1 كوب فول مدشوش (بدون قشور)

1 كوب خضرة (بقدونس + كزبرة + شبت)

1 بصلة متوسطة الحجم مقطعة 4 قطع

3 فصوص توم

ملح (الكمية حسب الرغبة)

فلفل اسود

كمون

شطة (ممكن نستغنى عنها)

للتزيين

1 بصلة متوسطة مقطعة شرايح (تقلية)

ولوعايزة تستبدلي البصل بالتوم للتزيين ممكن بس هنضيف مع التوم ملعقة كزبرة ناشفة

زيت لتحمير التقلية

الطريقة

أول حاجة هنبل الفول يعني هنحطه في ماء لمدة ساعتين ، وبعد نقع الفول لمدة ساعتين هنجيب إناء ونحط فيه الفول والخضرة والبصلة المقطعة 4 قطع والتوم ونغطيهم بالماء ونرفع الإناء على النار (نار متوسطة) ونسيبه لحد ما يستوي ، (ملحوظة : بلاش نغطي الإناء علشان نحافظ على لون الخضرة ومايتغيرش ويبقى لونه فاتح أو أصفر) وبعد ما يستوي هنشيله من على النار ونسيبه لحد ما يبرد ، وبعد ما يبرد نخلطه في الخلاط (ناخد بالنا ممكن مانحطش كمية الماء كلها اللي مع الفول يعني هناخد الكمية اللي هنحتاجها بس مع الفول واحنا بنخلطه علشان لو زادت كمية الماء في البصارة هتبقى خفيفة واحنا عايزين قوامها متوسط مائل للقوام الغليظ) والخلط لازم يكون جيد جداً علشان ما يبقاش في تكتلات يعني عايزينها تبقى انسيابية ، وبعد ما نخلطها هنسيبها شوية على جنب ونبدأ نحمر التقلية (سواء بصل أو توم حسب الرغبة ولو توم يبقى ماننساش الكزبرة الناشفة) وناخد بالنا ونقلب باستمرار علشان ما تتحرقش مننا ، وبعد ما تاخد اللون الدهبي نشيلها من على النار وبعد كده هنشيلها من الزيت ونحط مكانها البصارة اللي خلطناها في الخلاط (على المادة الدهنية اللي حمرنا فيها التقلية ) ونقلب ونرفعها على نار هادية ونحط التوابل ونقلب وبعد ما توصل للقوام المطلوب (الغليظ) نشيلها من على النار، وبعد كده نحط البصارة في أطباق التقديم ونزينها بالتقلية (البصلة المحمرة أو التوم بالكزبرة الناشفة) هنرشها على وش الطبق وبكده هنكون عملنا أحلى وأفيد طبق بصارة وبالهنا والشفا