طريقة عمل المكرونة بالبشاميل

طريقة عمل المكرونة بالبشاميل

المكرونة بالبشاميل من الاكلات اللذيذة و المحبوبة لدي الجميع وهي تحتوي علي مكونات تجعلها متكاملة العناصر الغذائية علي سبيل المثال :

اللحمة المفرومة تعطي بروتين المكرونة تعطي نشويات اللبن يعطي كالسيوم . إلي جانب باقي المكونات وفوائدها .

المكونات :

1/4 كيلو لحمة مفرومة .

بصلة ممتوسطة .

1/2 كيلو مكرونة قلم .

1/2 كيلو لبن ( حليب ) .

2 ملعقة زبدة أو سمنة .

2 ملعقة دقيق .

1 ملعقة صلصة .

ملح (حسب الرغبة ).

فلفل أسود أو أبيض .

بهارات .

جبنة رومي أو موتزريلا (حسب الرغبة يعني ممكن نستغني عنها )

طريقة العمل :

أول حاجة هنسلق المكرونة ( يعني هنحط علي النار إناء فيه مية و شوية ملح ولما تغلي هنحط المكرونة ونهدي النار شوية ونسيبها لحد ماتستوي ) بعد كده هنعصج اللحمة (يعني نقطع البصلة ونقلبها مع ملعقة سمنة علي نار هادية لحد ماتصفر بس وبعد كده هنحط اللحمة المفرومة ونقلب ونحط التوابل ماعدا الملح (علشان لو حطينا الملح قبل مااللحمة تستوي هتخرز مننا ) وبعد ما اللحمة تستوي نحط الملح ونقلبه مع اللحمة ونشيلها من علي النار .

 نيجي بقي للبشاميل هنحط الزبدة أو السمنة علي نار هادية وبعده

  علي طول الدقيق ونقلب كويس لحد مايختلطوا ببعض بحيث إن الدقيق

 مايبقاش باين بعد كده هنحط اللبن (الحليب) ببطء مع الاستمرار في التقليب( والافضل ان اللبن (الحليب) يكون بارد علشان مايكلكعش مننا ) ونقلب بمضرب سلك لضمان انسيابية البشاميل  بعد كده هنحط التوابل (الملح و الفلفل و البهارات ) و لما البشاميل يستوي و نوصل للمقام اللي عايزينه (بشاميل خفيف أو تقيل ) نشيله من علي النار ونجيب صينية للمكرونة بس قبل مانحط المكرونة  في الصينية هنقلب فيها ملعقة الصلصة (هتدي لون جميل ) وهنقلب معاها كمان 3 ملاعق بشاميل بعد كده هنحط نص المكرونة  في الصينية وفوقها اللحمة المفرومة المعصجة وبعدين نص المكرونة التاني وننزل بالبشاميل فوق المكرونة  ولو هنستخدم جبنة نحطها علي الوش (ملحوظة لو هنحط جبنة رومي نحطها قبل ماتدخل الفرن لكن لو موتزريلا يبقي هندخل المكرونة الأول لحد ماتدخل في السوي ونطلعها نرش عليها الموتزريلا وندخلها تاني لحد ما الموتزريلا تسيح بس ) وندخل صينية المكرونة في فرن ساخن حوالي 1/2 ساعة ولو الوش ماخدش لون نفتح عليه الشواية دقيقتين وبكده نكون عملنا أحلي صينية مكرونة بالبشاميل وبالهنا والشفا