بيكاتا اللحم بالمشروم

بيكاتا اللحم بالمشروم

البيكاتا بالمشروم من الاكلات اللذيذة التي يحبها الجميع كباروصغار وممكن عمل البيكاتا من الدجاج وممكن من اللحم . وإليكم وصف تفصيلي لعمل بيكاتا اللحم بالمشروم .

مكونات ومقادير بيكاتا اللحم بالمشروم

1/2 كيلو لحم بتلو (مقطع شرائح)

1/4 كيلو مشروم (مقطع قطع متوسطة الحجم)

مادة دهنية (زيت أو سمنة أوزبدة )

1 بصلة متوسطة الحجم

3 فصوص توم

1/2 1 : 2 كوب كريمة لباني (البديل : كوب حليب مذوب فيه ملعقة كبيرة دقيق)

ملح (الكمية حسب الرغبة)

فلفل اسود (حسب الرغبة)

بهارات لحمة

طريقة عمل بيكاتا اللحم بالمشروم

أول حاجة هنتبل اللحمة بالملح والفلفل ، بعد كده هنحط مادة دهنية في طاسة ولما الطاسة تسخن هننزل باللحمة ونشوحها وبعدين نقلبها على الجنب التاني وبعد ماتتشوح كويس وتاخد لون نشيلها ونحط مكانها البصل والتوم ونشوحهم ولما البصلة تاخد اللون الأصفر ننزل بالمشروم ونقلب بعد كده هننزل باللحمة المشوحة ونقلب المكونات كلها مع بعضها ونحط الملح والفلفل الأسود وبهارات اللحمة ونقلب وبعد كده هنضيف للمكونات الكريمة اللباني ونقلب لحد ماتمتزج المكونات ولو محتاجة شوية مرقة نحط القليل بعد كده نغطيها ونهدي النار لحد بس ما نوصل للقوام اللي عايزينه (متوسط السمك) ولما نوصل للقوام المطلوب نشيلها من على النار ونحطها في طبق التقديم (لو عايزين نجرنشها ده هيكون حسب الذوق وطبعاً كل ما تكون أبسط يكون أفضل ) وممكن نسيبها زي ما هي من غير جرنشة وهنقدم معاها رز أبيض

طريقة الرز الأبيض :

نجيب إناء ونحط فيه مادة دهنية ونجيب الرز المغسول ونضيفه للمادة الدهنية ونقلب وبعد كده نحط الملح ونقلب وبعد كده نحط الماء (نغطي الرز بالماء) ونغطيه ونسيبه لحد ما الماء يغلي نهدي النار ونسيبه لحد ما يستوي وبعد كده نشيله من على النار ونحطه في طبق التقديم ونقدمه مع بيكاتا اللحم بالمشروم

وممكن كمان نقدم البيكاتا مع  مكرونة (أي نوع مفضل لكم) بالصلصة وطبعاً مش هننسى أهم طبق وهو طبق السلطة الخضرا جربوها إن شاء الله تعجبكم وبالهنا والشفا