طريقة عمل المكرونة بالصلصة البيضاء خطوة بخطوة بالصور

طريقة عمل المكرونة بالصلصة البيضاء خطوة بخطوة بالصور

الطبق اللي هنعمله النهاردة إن شاء الله هو طبق المكرونة بالصلصة و هو  من ألذ وأسهل الاطباق ووقت تحضيره لا يتجاوز 10 دقايق لأن الصلصةالبيضا بنحضرها في نفس الوقت اللي بنسلق فيه المكرونة وبكده بنختصر. الوقت يللا بينا نبدأ:

مكونات طبق المكرونة بالصلصة :

كيس مكرونة أي نوع (أنا هستخدم الاسباجيتي)

2 ملعقة زبدة (مكعب)وممكن نستبدله بسمنة.

2 ملعقة دقيق (طحين).

كوب لبن (حليب).

ملح  حسب الرغبة .

فلفل أسود أو أبيض حسب الرغبة .أنا هستخدم الفلفل الاسود .

1/4 ملعقة صغيرة سكر.

1/2 ملعقة صغيرة زعتر.

فلفل حار حسب الرغبة.

1/2 كوب جبن مبشورأي نوع (أنا هستخدم بارميزان)

طريقة عمل المكرونة بالصلصة البيضا :

أول حاجة هنعملها هنسلق المكرونة هنحط علي النار وعاء فيه مية وشوية ملح ونسيبه يغلي وبعد ما يغلي هنحط المكرونة علي نار هادية ونسيبها لحد ماتستوي

ودلوقتي هنبدأ نعمل  الصلصة البيضا أول حاجة  هندوب الزبدة في وعاء بعد كده هنحط الدقيق (الطحين( نخلطهم كويس جداَ علي نار هادية

بعد كده هنضيف الحليب ببطء مع الاستمرار في التقليب

لحد ما الصلصة تتقل وتبقي بالشكل ده

بعد كده هنضيف الملح والفلفل والسكر

وبعد كده هنحط الزعتر والفلفل الحار ونقلب 

وبعد كده هنشيلة من علي النار ونحط عليه الجبنة المبشورة ونسيب شوية للتزيين

ونقلب كويس جدا علشان الخليط كله يتجانس بعد كده هنجيب المكرونة اللي سلقناها

وهنحط عليها الصلصة البيضا (كمية تناسب المكرونة )  وطبعاً نقلبها كويس جداً

وبعد كده هنحطها في طبق التقديم ونرش عليها جبنة مبشورة وشوية فلفل حار وممكن شوية زعتر

وده هيكون الشكل النهائي لطبق المكرونة بالصلصة البيضا

ملحوظة : الطبق ده لازم يتقدم وهو سخن علشان كده لوهتعمليه يبقي تجهزيه وقت الاكل يعني مثلاً قبل الاكل ب 10 دقايق لانه زي ماقلنا إنه مش بياخد وقت في تحضيره و تجهيزه والطبق ده ممكن نقدم معاه بوفتيك أو فراخ بانيه وشيبسي وسلطة وبكده هتكون وجبة متكاملة العناصر الغذائية و لذيذة جداً جداً وبالهنا والشفا