طريقة عمل الكشري المصري بالتفصيل

طريقة عمل الكشري المصري بالتفصيل

الكشري من الاكلات المصرية التي يشتهر
 بها المصريون وهو من الاكلات اللذيذة والمحبوبة لدي الكبار و الصغار وهو من الاكلات السريعة والجميع يعلم خطورة تناول الاطعمة خارج المنزل لذلك لابد أن نتعلم جميعا طريقة عمل الكشري

مكونات و مقادير ألذ طبق كشري : 

- نص كيلو رز .

- القليل من الشعرية .(حسب الرغبة)

- ربع كيلو عدس بجبة (البني) .

- نص كيلو مكرونة صغيرة .

- ربع كيلو مكرونة اسباجيتي .

- صلصة طماطم .

- بصل مقطع شرائح .

ملحوظة :(المقادير حسب الرغبة و الاحتياج زيادة أو نقصان)

مكونات دقة الكشرى :

-        توم .

-        كسبرة (كزبرة) ناشفة .

-        ليمون .

-        خل .

طريقة عمل الكشري :

نسلق المكرونة وناخد بالنا من حاجة مهمة وهي اننا هنحط الاول المكرونة الاسباجيتي وبعدها بحوالي دقيقتين نحط المكرونة الصغيرة(لأن المكرونة الاسباجيتي بتاخد وقت في التسوية  أكتر قليلا من المكرونة الصغيرة)وطبعا هنحط قليل من الملح  ونسيبهم علي نار متوسطة لحد ما تستوي بعد كده هنسلق العدس وهنحط معاه أثناء السلق ملح و كمون وزيت .نيجي للرز لو هنحط شعرية يبقي هنحمرها وبعدين نضيف الرز ونقلب وبعد كده هنسقي الرز بالمية اللي سلقنا بيها العدس (لو مش هنحط شعرية يبقي هنغلي المية اللي سلقنا فيها العدس وبعدين ننزل بالرز)

هنحط مع الرز ملح وقليل من الكزبرة الناشفة وزيت ونسيبه علي نار متوسطة لحد ما يتشرب ونوطي عليه لغاية ما يستوي

نيجي لعمل الدقة : نجيب التوم المدقوق ونحطه في شوية زيت صغيرين ونقلبه تقليبتين وقبل ما ياخد لون نحط عليه شوية كزبرة صغيرين ونقلب تقليبتين ونطفي بشوية خل ونشيله من علي النار بعدين نحط عليه نص لمونة وشوية مية وقليل من الملح ومعلقة أو معلقتين صلصة حسب الرغبة و اللون اللي عايزاه .

الصلصة بقي هنسبكها عادي وهنحط عليها ملح وتوم مدقوق .

أما بالنسبة للتقلية بعد ما نقطعها شرايح هنرش عليها شوية دقيق علشان لما نحمرها تبقي مقرمشة زي اللي في المحلات.

وبكده هنكون عملنا أحلي طبق كشري بيتي مضمون وصحي .

وبالهنا والشفا