خرشوف محشى خضار سوتيه

أكلة لذيذة قليلة السعرات الحرارية ومناسبة جداً للدايت

المكونات والمقادير :

كمية مناسبة من الخرشوف

بصلة متوسطة

1/4 كيلو جزر

1/4 كيلو كوسة

1/4 كيلو بسلة

1/4 كيلو فاصوليا خضراء

3 ملاعق زيت زيتون

مشروم حسب الرغبة (يمكن الاستغناء عنه)

(الخضار كله مقطع مكعبات )

ملح

فلفل أسود

بشاميل دايت

أولاً : طريقة البشاميل الدايت

حوالي 1/2 و1 : 2 ملعقة دقيق (طحين ) مع 1/2 كوب لبن (حليب) تقليب علي البارد بعد كده هنحطه علي نار هادية مع الاستمرار في التقليب (يفضل التقليب بمضرب سلك) وهنحط الملح والفلفل الأسود ونستمر في التقليب لحد مايوصل للقوام اللي عايزينه

طريقة عمل الخرشوف المحشي خضار سوتيه :

أول حاجة ننضف الخرشوف كويس جداً ونجيب إناء نحط فيه ماء وملح وليمون ونحطه علي النار ونحط فيه الخرشوف ونسيبه لحد مايستوي ونصفيه . أما بالنسبة للسوتيه هنجيب طاسة ونحط فيها زيت الزيتون وننزل بالبصل المكعبات ونقلب لحد مايصفر بعد كده هنضيف الجزر ونقلب ونضيف البسلة ونقلب والفاصوليا الخضرا ونقلب ولو استخدمنا المشروم هنحطه وآخر حاجة هنحط الكوسة لانها بتاخد أقل وقت في التسوية بعد كده هنحط الملح والفلفل الأسود ونقلب لحد ما الخضار يدبل هنشيله من علي النار ونبدأ في حشو الخرشوف هنحط كمية مناسبة من الخضار السوتيه في الخرشوفة ونحط عليها بشاميل بكمية مناسبة وهنكمل الباقي بنفس الطريقة لحد مانخلص المقدار كله ونجيب صينية مدهونة بمادة دهنية ( زيت أو سمنة) ونرص فيها الخرشوف المحشي بالخضار السوتيه (ممكن نرش فوق البشاميل جبنة مبشورة أي نوع حسب الرغبة ) بعد كده هندخلها في فرن ساخن علي درجة حرارة 180 درجة لحد ما تاخد لون ونطلعها ونحطها في طبق التقديم ونقدمها ساخنة وممكن نقدم معاها شوربة الشوفان (دايت) مع صدر دجاجة .

مكونات ومقادير شوربة الشوفان :

3 ملاعق شوفان

صدر دجاجة

1بصلة صغيرة

2 فص توم

2 ملعقة زيت زيتون

ملح

فلفل اسود

بهارات

الطريقة :

أول حاجة هنقطع صدر الدجاجة مكعبات صغيرة ونحطها في ماء علي النار ونسيبها تستوي بعد كده هنجيب طاسة ونحط فيها الزيت ونشوح فيها البصل والتوم بعد كده هنضيف الملح والفلفل والبهارات بعد كده هنضيفهم للشوربة اللي فيها الصدر المسلوق ونسيبهم علي النار شوية و آخر حاجة هنحط الشوفان ونقلب ونهدي النار ونسيبة لحد ما يستوي

وبكده هنكون قدمنا وجبة دايت مكونة من خرشوف محشي خضار سوتيه مع شوربة شوفان بصدر دجاجة وهنقدم معاهم طبق سلطة خضرا وبالهنا والشفا

خرشوف محشى خضار سوتيه