طريقة عمل سويسرول الهوهوز في المنزل بدون أي مواد حافظة

طريقة عمل سويسرول الهوهوز في المنزل بدون أي  مواد حافظة 

سويسرول الهوهوز من ألذ أنواع الكيك وهذا النوع محبوب من الصغار والكبار . هنعمله إن شاء الله صحي و بدون أي مواد حافظة . 

المكونات والمقادير :

1 كوب لبن (حليب) .

1 كوب سكر .

1 كوب زيت .

3 ملاعق كاكاو خام (كاكاو مر) .

2 بيضة .

1 كيس بيكينج بودر .

1 كيس فانيليا .

1 كوب دقيق (طحين) .

للحشو :

كريم شانتي ، أو مربي أي نوع حسب الرغبة .

طريقة عمل سويسرول الهوهوز :

أول حاجة هنخلط اللبن (الحليب) والسكر والزيت والكاكاو كويس جداً وبعد مانخلطهم ناخد من الخليط كوباية واحدة ونشيلها في التلاجة وباقي الخليط هنحط عليه البيض والفانيليا ونخلطهم كويس جداً وبعد كده هنخلط البيكينج بودر مع الدقيق (الطحين) ونضيفه للخليط بالتدريج مع التقليب ببطء علي شكل نص دايرة بعد ماتختلط المقادير مع بعضها كويس هنجيب الصينية ونحط عليها ورقة زبدة وندهنها بقليل من الزيت ونصب عليها الخليط ونساويه بحرص وندخله في الفرن (طبعاً لازم يكون الفرن ساخن) علي درجة حرارة 180 درجة ونسيبها لحد ماتستوي والمدة اللي هتاخدها تقريباً في التسوية حوالي 20:15 دقيقة . و بعد ماتستوي نخرجها ونبدأ علي طول نلفها رول بحرص شديد علشان ماتتقطعش وبعد ما نلفها هنسيبها لحد ما تبرد خالص وبعد ماتبرد نفردها علشان نحشيها . هنفرد عليها الكريم شانتي أو المربي ونلفها تاني بعد كده هنجيب الصوص ( اللي خلطناه في البداية واخدنا منه كوباية وحطيناها في التلاجة ) ونغطي السويسرول تماماً بالصوص من كل الجوانب وبعد كده هنحطها هي التلاجة لمدة ساعتين لحد ما الصوص يجف شوية . بعد كده هنخرجها ونزينها بخيوط رفيعة من الشيكولاتة وندخلها تاني التلاجة لمدة ساعة (التزيين الأخير ده اختياري ) بعد كده هنرص قطع السويسرول المستديرة في طبق التقديم وبكده هنكون قدمنا أحلي سويسرول هوهوز في المنزل آمن و بدون أي مواد حافظة وطعمه لذيذ وبالهنا و الشفا