طريقة عمل التورلي

 طريقة عمل التورلي

أكلة لذيذة ومفيدة لانها متكاملة العناصر الغذائية فهي تضم مجموعة من الخضار مع اللحمة .

المكونات والمقادير :

1/2 كيلو لحمة مقطعة مكعبات صغيرة .

1/2 كيلو بسلة .

1/2 كيلو بطاطس مقطعة مكعبات .

1/2 كيلو كوسة .

1/2 كيلو جزر .

1/4 كيلو فاصوليا خضراء .

1 ملعقة زبدة أو سمنة .

بصلة كبيرة .

3 فصوص توم .

طماطم .

صلصة طماطم .

ملح .

فلفل اسود .

بهارات .

حبهان .

(مقادير الخضار كلها اختيارية علي حسب الرغبة )

الطريقة :

أول حاجة هنسلق اللحمة ، هنحطها في إناء علي نار متوسطة ومعاها بصلة صغيرة وفصين توم وحبهان واسيبها لحد ما تستوي ونبدأ في تجهيز الخضار  ننضفه ونغسله ونقطعه و بعد كده هنخلط الخضار كله مع بعضه ومعاه بصل مقطع مكعبات و3 فصوص توم والملح والفلفل و البهارات وبعد كده هنشيل اللحمة من علي النار بعد ما تستوي 3/4 سوى ونضيفها مع الخضار ونقلب معاهم الصلصة والزبدة أو السمنة ونحطهم في صينية ونقطع الطماطم ونحطها علي وش الصينية ونحط معاهم شوية مرقة لحمة بعد كده هنبدأ نسوي التورلي (الخضار المشكل) ممكن نسويه الأول علي البوتاجاز من فوق وبعد كده نكمل التسوية في الفرن ( علشان نقلل من وقت التسوية داخل الفرن ) وممكن ندخله في الفرن علي طول وتكون درجة حرارة الفرن متوسطة أول 1/2 ساعة (بعد كده نعلي درجة حرارة الفرن ) ونسيبها لحد ما تستوي وناخد بالنا ! لازم نتابعها علشان نزود المرقة كل ما تحتاج ( يعني بلاش نسيبها لحد ما تنشف ) وبعد ما تستوي هنقدمها ونقدم معاها رز ابيض أو رز بالشعرية .

طريقة الرز بالشعرية :

هنجيب إناء ونحط فيه مادة دهنية (زيت أوسمنة أوزبدة مع زيت) ونحطه علي النار وبعدين نحط 1/4 كيلو شعرية (ممكن نقلل الشعرية حسب الرغبة ) ونقلبها لحد ما يبقي لونها دهبي هنحط الملح وبعد كده هنحط الرز ونقلب كويس وبعد كده هنحط المية نغطي بيها الرز وأول مايغلي غلوة نهدي النار ونسيبه لحد مايستوي وبعد كده هنحطه في طبق التقديم ونقدمه مع التورلي وبالهنا والشفا