طريقة عمل كيكة الرخام

طريقة عمل كيكة الرخام

مقادير الكيكة :

6 بيضات .

كوب ونصف سكر .

1 كوب لبن (حليب) .

1 كوب زبدة أو سمنة .

1/2 و 2 كوب دقيق (طحين) .

2 ملعقة كاكاو خام (مر) .

2 كيس فانيليا .

1 كيس بيكينج بودر .

1 ملعقة صغيرة خل أبيض .

طريقة عمل كيكة الرخام :

أول حاجة هنضرب الزبدة أو السمنة مع السكر كويس جداً بعد كده هنضيف البيض بيضة بيضة مع الاستمرار في الضرب وطبعاً هنحط الفانيليا وبعد كده هنحط اللبن (الحليب) مع الاستمرار في الضرب ونخلط البيكينج بودر مع الدقيق (الطحين) ويتم اضافتهم بالتدريج مع التقليب الخفيف والتقليب يكون علي شكل نص دايرة بعد كده هنقسم الخليط إلي قسمين واحد هنسيبه زي ماهو والتاني هنحط عليه الكاكاو الخام (المر) دلوقتي هنشغل الفرن علشان يسخن (لأن الكيكة لازم تدخل في فرن يكون ساخن ) . بعد كده نجيب صينية ندهنها بمادة دهنية (زيت أو سمنة ) وهنرش علي المادة الدهنية رشة دقيق (طحين) ونقلب الصينية علي وشها علشان ننزل الدقيق (الطحين) الزايد ونبدأ نحط الكيكة في الصينية :

هنصب الأول جزء (كمية قليلة) من العجين الأبيض و بعدين  نصب فوقه جزء (كمية قليلة ) من العجين الغامق (اللي خلطناه بالكاكاو الخام ) وبعدين جزء تاني من العجين الأبيض (نفس الكمية اللي بنحطها ) وفوقه جزء من العجين الغامق وهكذا لحد ما تنتهي الكمية كلها (كل ده لازم يتم بحرص شديد علشان العجين ما يختلطش ببعضه ومش هيكون شكل الكيكة حلو) بعد كده هنحرك الصينية حركة بسيطة جداً علشان نساويها و بعد كده هندخلها في الفرن الساخن علي درجة حرارة 180 درجة س (360 ف) لمدة حوالي 1/2 ساعة (طبعاً بلاش نفتح الفرن قبل ماتعدي 1/3 ساعة علي دخول الكيكة في الفرن ) وبعد مايعدي الوقت اللي قلنا عليه لاتمام تسوية الكيكة هنتأكد الأول إذا كانت استوت وللا لسة . هننزل في الكيكة سن سكينة رفيع أو ممكن ننزل خلة لو طلعت نظيفة ( خالية من  العجين ) يبقي كده استوت وبالهنا والشفا .