طريقة عمل الهريسة

طريقة عمل الهريسة

الهريسة من الحلويات الشرقية اللذيذة والمحبوبة والمفيدة أيضاً وهي شبيهة بالبسبوسة مع فروق بسيطة منها مثلاً إن البسبوسة ممكن نحطلها جوز هند وممكن مانحطش لكن الهريسة لازم جوز هند لأن جوز الهند من المكونات الأساسية للهريسة . كمان السكر في الهريسة أكتر من السكر اللي في البسبوسة . وطريقة عمل الهريسة  بسيطة وسهلة جداً .

المكونات والمقادير :

2 كوب سميد (بتاع البسبوسة ).

1 كوب لبن (حليب) .

1 كوب جوز هند .

1 كوب زيت أو سمنة أو زبدة (حسب الرغبة).

1 كوب سكر .

1 ملعقة صغيرة بيكينج بودر .

مقادير الشربات :

1 كوب ماء .

2  كوب سكر .

1/2 ليمونة .

فانيليا .

طريقة تحضير الشربات :

نحط الماء والسكر في إناء علي النار ونسيبه لحد مايغلي ويتقل شوية بعد كده هنحط النص ليمونة وبعدها هنحط الفانيليا ونشيله من علي النار ونسيبه يبرد ( علشان هنحطه علي الهريسة وهو بارد )

طريقة عمل الهريسة :

هنجيب إناء ونحط فيه السميد والسكر وجوز الهند و المادة الدهنية

( الزيت أو السمنة أو الزبدة ) و البيكينج بودر ونخلطهم مع بعض كويس بعد كده هنبدأ نضيف اللبن (الحليب) شوية بشوية علشان مايزيدش مننا ونحافظ علي القوام المظبوط (اللي هو متوسط . يعني مش غليظ ولا خفيف) لحد ماتتماسك العجينة وتكون متوسطة القوام بعد كده هنجيب صينية مناسبة وندهنها بمادة دهنية ونحط العجينة في الصينية ونساويها كويس وممكن نزينها بالمكسرات (ممكن لوز أو بندق أو فول سوداني ) حسب الرغبة والامكانيات وممكن من غير تزيين  وندخلها في فرن ساخن علي درجة حرارة 180 درجة ونسيبها لحد ماتستوي وبعد ماتستوي هنخرجها من الفرن ونسقيها علي طول وهي ساخنة بالشربات البارد (اتقل شوية من شربات البسبوسة ) وندخلها الفرن (وهو مقفول بس لسة ساخن ) علشان الهريسة تتشرب بالشربات وبعد كده هنخرجها من الفرن ونسيبها تبرد علشان هنقطعها بعد ماتبرد خالص (مش هنقطعها وهي سخنة طبعاً ) وبالهنا والشفا