طريقة عمل المحوجة :

طريقة عمل المحوجة :

المحوجة من الاغذية المفيدة جداً وذات قيمة غذائية عالية جداً وهي حلوي أشبه بالبسكوت وتشتهر بها محافظة دمياط والمحوجة يتم صنعها من مكونات لها قدرة هائلة علي إمداد الجسم بمعادن لها مفعول قوي في علاج الانيميا وأيضاً الوقاية من الانيميا بالاضافة إلي رفع مناعة الجسم

مكونات ومقادير المحوجة :

2 كوب دقيق .

1 كوب زيت .

1/2 كوب سكر بودر (سكر مطحون).

ملعقة صغيرة بيكينج بودر .

ملعقة صغيرة حبة البركة .

ملعقة كبيرة سمسم .

ملعقة كبيرة عسل أسود .

2 ملعقة كبيرة حلبة مطحونة (ممكن تطحنيها بنفسك في البيت و ممكن تجيبيها مطحونة جاهزة من عند العطار )

رشة ملح .

طريقة عمل المحوجة :

هنجيب الدقيق و نحط عليه المكونات الجافة 1/2 كوب سكر بودر و ملعقة صغيرة بيكينج بودر وملعقة صغيرة حبة البركة و ملعقة كبيرة سمسم (طبعاً لو السمسم أبيض و مش مطحون يبقي هنقلبه تقليبتين علي النار علشان يتحمص شوية . يتحمص بس مش يتحرق ) و ملعقة كبيرة عسل اسود و2 ملعقة كبيرة حلبة مطحونة و رشة ملح نخلطهم مع بعض كويس جداً بعد كده هنحط الزيت ( ممكن نحطه بارد يعني زي ما هو و ممكن

نسخنه بسيط بس ناخد بالنا علشان ما يتحرقش ) وطبعاً نقلب كويس جداً لغاية ما الخليط كله يتجانس . نيجي بقي لمرحلة التسوية : هنجيب صينية

مناسبة لكمية الخليط اللي عملناه و ندهنها بمادة دهنية (زيت أو سمنة )

و ممكن رشة دقيق فوق المادة الدهنية  (زي الكيكة )و ممكن نكتفي بدهانها بمادة دهنية بس بعد كده هنحط في الصينية و نساويه كويس (و ممكن علشان ايدينا ما تطبعش و تعلم فيها واحنا بنساويها نبلها مية بسيط و نساوي و ندخلها الفرن علي درجة حرارة 180 درجة وبتستوي في حوالي 1/2 ساعة و بعد ماتستوي نخرجها من الفرن ونسيبها تبرد و بعد كده هنقطعها و نقدمها .وبكده هنكون عملنا أحلي محوجة و بالهنا و الشفا