طريقة عمل ليزي كيك (بسكويت السوكسيه )

طريقة عمل ليزي كيك (بسكويت السوكسيه )

الليزي كيك (بسكويت السوكسيه) هو من الحلويات الغربية اللذيذة و طريقته سهلة جداً وسريعة ولا يوجد بمكوناته دقيق (طحين) ويمكن صنعه بالبيض أو بدون استخدام البيض بالإضافة إلى إنه لا يطهى على النار

وهنشرح إن شاء الله بالتفصيل مكونات ومقادير ليزي كيك (بسكويت السوكسيه) وطريقة عمله بدون بيض .

مكونات ومقادير ليزي كيك (بسكويت السوكسيه )

2 باكو بسكويت سادة (بسكويت شاي)

1 باكو فانيليا

1/2 كوب سكر

1/2 كوب زبدة بدرجة حرارة المطبخ

1/2 كوب كاكاو خام (غامق بدون سكر) وممكن نستخدم شيكولاتة خام (غامقة) بدلاً من الكاكاو وطبعاً هندوبها في حمام مائي

1/2 كوب لبن (حليب) وممكن نستخدم حليب مكثف أو ممكن نستخدم لبن (حليب) بودر مذاب في ماء .

طريقة عمل ليزي كيك (بسكويت السوكسيه)

نخلط السكر مع الزبدة كويس جداً ، بعد كده نضيف الحليب والفانيليا ونخلط ، بعد كده هنضيف الكاكاو و نخلط مدة لا تقل عن 5 دقائق وآخر حاجة هنكسر البسكويت (مش نطحنه)بحيث يكون قطع متوسطة الحجم ونضيفه للخليط ونقلبهم مع بعض كويس جداً إلى أن يمتزجوا بعد كده هنجيب ورق زبدة أو نايلون أو ورق ألومنيوم ( يعني المتاح ) ونحط عليه الخليط ونلفه بالشكل اللي نحبه وممكن نحطه في كيس ونحط الكيس في قالب علشان ياخد شكل القالب (ولو متوفر عندنا قالب غير لاصق ممكن ندهنه بقليل من الزيت ونصب فيه الخليط) ، بعد كده هنحطه في التلاجة أو الفريزر وطبعاً لو في التلاجة هياخد وقت أطول من الوقت اللي هياخده لو كان في الفريزر ( لو في التلاجة هياخد حوالي 5 : 6 ساعات تقريباً ، وفي الفريزر هياخد حوالي 2 : 3 ساعات تقريباً ) وبعد الفترة دي هيكون إن شاء الله تماسك وأخد الشكل اللي عايزينه ، ولما يتماسك  هنخرجه من التلاجة أو الفريزر علشان نجهزه للتقديم ، هنقطعه حسب الرغبة وحسب السمك اللي نحبه ونرصه في طبق التقديم ونقدمه مع الشاي وبالهنا والشفا