أكلات دايت

 أكلات دايت

هنقدم مجموعة من الاكلات الصحية (الدايت) علشان الناس اللي بتعمل ريجيم ماتتحرمش من حاجة .

  نوتيلا  

المكونات والمقادير :

3 ملاعق  كبيرة لبن (حليب) بودر خالي الدسم .

3 ملاعق كبيرة كاكاو خام (من غير سكر) .

1 ملعقة كبيرة عسل .

1 ملعقة كبيرة سكر دايت .

1 ملعقة زيت درة .

1 ملعقة صغيرة نسكافيه .

1 ملعقة صغيرة قرفة (حسب الرغبة) .

رشة ملح .

ماء بارد (الكمية حسب الاحتياج) .

الطريقة :

نخلط المكونات كلها مع بعض ماعدا الماء هنحطه في الاخر بالتدريج لحد مانوصل للقوام اللي عايزينه بعد كده هنحطه في برطمان ونحطه في التلاجة وبالهنا والشفا .

 تشيز كيك دايت 

تشيز كيك طعمه لذيذ ويحبه الصغار والكبار وطبعاً سعراته الحرارية منخفضة .

المكونات والمقادير :

150 جرام بسكوت لايت .

250 جرام جبنة كريمي لايت .

كوب كريمة لايت .

1 ملعقة صغيرة زبدة خالية الدسم .

1 ملعقة كبيرة سكر دايت .

للتزيين (حسب الرغبة)

مربي فراولة بدون سكر أو بسكر دايت (أو صوص فراولة)

فراولة

الطريقة :

نفرم البسكوت كويس جداً ونخلطه بالزبدة ونحطه في قالب سهل الفتح ونضغط عليه كويس جداً بعد كده هنخلط الجبنة الكريمي مع الكريمة مع السكر خلط كويس جداً بعد كده هنحطه في القالب اللي ضغطنا فيه البسكوت ونساويه كويس وبعد كده هندخله التلاجة علشان يتماسك هنسيبه حوالي 4 ساعات بعد كده هنخرجه ونبدأ نزينه بالمربي هنخفف المربي بشوية ماء دافي ونقلبهم كويس جداً ونحطها علي الكريمة من فوق وأخيراً نزين بالفراولة ونقدم أحلي تشيز كيك دايت وبالهنا والشفا

 مهلبية الشوفان 

المكونات والمقادير :

3 ملاعق كبيرة شوفان مطحون .

كوب لبن (حليب) خالي الدسم .

 سكر دايت أو عسل(حسب الرغبة).

فانيليا .

للتزيين فاكهة أومكسرات حسب الرغبة

الطريقة :

هنحط اللبن (الحليب) علي النار ومعاه السكر والفانيليا بعد كده هننزل بالشوفان المطحون ونقلب ونهدي النار ونستمر في التقليب وناخد بالنا علشان مايتحرقش مننا لحد مانوصل للقوام المناسب بعد كده هنحطه في أطباق ونزينه بالفاكهة أو المكسرات وبالهنا والشفا