طريقة عمل القرص الفلاحي (القرص الطرية):

طريقة عمل القرص الفلاحي (القرص الطرية):

المكونات والمقادير:

-        كيلو دقيق .

-        نص كيلو لبن (ممكن يزيد أوينقص علي حسب نوع الدقيق)

-        2 ملعقة شمر .

-        2 ملعقة سمسم.

-        1 ملعقة سكر.

-        1 ملعقة خميرة جافة (لو هتستعملي خميرة بيرة هتجيبي قطعة في حجم عين الجمل)

-        كوب سمنة .

-        ذرة ملح.

طريقة العمل :

هنجيب الدقيق ونحط عليه ذرة ملح وملعقة سكر و2ملعقة شمر و2 ملعقة سمسم بس قبل مانحطهم هنشوحهم الأول (يعني نحطهم في طبق ونقلبهم تقليبتين علي النار ثواني بس وناخد بالنا علشان مايتحرقش مننا) هنخلطهم مع بعض كويس وبعدين نقدح السمنة (يعني نسخنها علي النار) ونحطها علي الدقيق ونقلب بأي حاجة بلاش بالايد لأنها هتكون سخنة جدا وأول ما تبرد نشتغل بالايد وندوب الخميرة مع ملعقة سكر في مية دافية أو لبن دافي ونحطهم علي الدقيق ونعجن ونكمل عجن باللبن وطبعا لازم نخدم العجينة (يعني نعجنها كويس جدا)ونديها وقتها في العجن وبعد مانخلص نغطي العجينة كويس ونسيبها تخمر حوالي ساعة وبعد ما تخمر نبدا نشكلها هنقطعها علي حسب الحجم اللي احنا عايزينه هنكورها وبعدين نبططها ونرص في الصينية اللي هندخلها الفرن وبعد كده هنغطيها ونسيبها تخمر مرة تانية نيجي لمرحلة التسوية طبعا لازم  نكون مجهزين الفرن يعني هنسخنه قبلها بفترة  وقبل ما ندخل القرص في الفرن ممكن نعمل حاجة من اتنين إما اننا ندخلها زي ما هي وإما اننا ندهن وشها باللبن(الحليب)ده لو عايزين يكون وشها بيلمع وممكن نرش سمسم براحتنا بعدكده هندخلها في الفرن علي درجة حرارة 180 درجة بتستوي بعد حوالي نص ساعة بس طبعا لازم نتابع لأن مدة التسوية بتتوقف علي نوع وطبيعة الفرن بتاعنا  طبعاً لو احمرت من تحت وفوق لسة ممكن نقلبها علي الو ش التاني وممكن نفتح عليها الشواية شوية بس أهم حاجة ناخد بالنا علشان الوش مايتحرقش نيجي بقي لمرحلة ما بعد التسوية  ودي مرحلة مهمة جدا لأن في ناس كتير بتشتكي من ان القرص بتبقي ناشفة زي القراقيش طب نعمل إيه علشان تفضل طرية ؟؟؟ أول مانطلع القرص نلفها في قماشة نضيفة هتحتفظ بالسخونية وتفضل طرية وبالهنا والشفا