طريقة عمل اسكالوب بانيه

طريقة عمل اسكالوب بانيه

 المكونات والمقادير

1/2 كيلو لحم شرائح (اللحم من عرق الفلتو) .

دقيق (طحين) الكمية علي حسب الاحتياج .

بقسماط مطحون و الكمية علي حسب الاحتياج .

1 بيضة كبيرة أو اتنين صغيرين .

2 ملعقة كبيرة لبن (حليب) .

ملح حسب الرغبة .

1 ملعقة صغيرة فلفل اسود .

1 ملعقة صغيرة توم بودر .

1 ملعقة صغيرة بصل بودر .

1/2 ملعقة صغيرة حبهان مطحون .

1/2 ملعقة صغيرة كسبرة ناشفة .

1/2 ملعقة صغيرة بهارات .

زنجبيل حسب الرغبة .

قرفة حسب الرغبة .

طريقة العمل :

أول حاجة هنعملها هندق اللحمة بالشاكوش الخشبي بتاع المطبخ لو مفيش ممكن إيد الهون يعني نتصرف المهم نبطط اللحمة كويس بعد كده هنجيب البيض ونحط عليه اللبن (الحليب) والملح والفلفل الأسود والتوم البودر والبصل البودر والحبهان والكسبرة الناشفة و البهارات (ولو هنستخدم الزنجبيل والقرفة هنحطهم ) ونضربهم كلهم مع بعض كويس لحد مايمتزجوا ويختلطوا كويس جداً وطبعاً هنحضر الدقيق وهنحطه في وعاء وكذلك البقسماط هنحطه في وعاء آخر بعد كده هنجيب اللحمة (الاسكالوب) هنحطه في الدقيق ونبطنه كويس جداً بعد كده هنحطها في البيض ونشيلها من البيض ننزلها في البقسماط نبطنها كويس جداًجداً وبعد مانخلص الكمية كلها بنفس الطريقة هنحط الاسكالوب في التلاجة علي الأقل 1/2 ساعة  علشان تتماسك ولما نيجي نقليها البقسماط يفضل ثابت مايتقشرش ويفك من الاسكالوب (وفي ناس كتير بتشتكي من الموضوع ده) بعد كده هنخرجه من التلاجة وندخل في مرحلة القلية هنحط زيت غزير في طاسة القلي ونسخنة وبعد مايسخن نهدي النار ونبدأ نقلي الاسكالوب (بلاش نقلب كتير علشان البقسماط مايتقشرش مننا ونفضل محافظين علي شكل الاسكالوب الجميل لحد مانخلص الكمية كلها ) ولما لونه يبقي دهبي نطلعه علي مناديل المطبخ علشان يصفي الزيت وبكده هنكون عملنا ألذ اسكالوب بانيه وهنقدم معاه مكرونة بالصلصة الحمرا أو الصلصة البيضا أوممكن نقدمها مع خضار سوتيه وطبعاً مش هننسي نقدم معاها البطاطس والسلطة جربوها إن شاء الله هتعجبكم وبالهنا والشفا